عالمی منڈی میں تیل کی قیمت 28 ڈالر بیرل سے بھی نیچے

قومی آواز ۔ نامہ نگار ۔ تہران: ایران پر عائد عالمی اقتصادی پابندیاں اٹھائے جانے کے بعد بین الاقوامی منڈی میں تیل کی قیمت میں کمی کا سلسلہ جاری ہے۔ آج برنٹ کروڈ کی فی بیرل قیمت کچھ عرصے کےلیے 28 ڈالر سے بھی نیچے دیکھی گئی تاہم بعدازاں اس میں کچھ اضافہ ہوا۔ یہ گزشتہ 13 برس میں پہلا موقع ہے کہ تیل کی فی بیرل قیمت 28 ڈالر سے کم ہوئی۔ معاشی ماہرین کا خیال ہے کہ بازار میں ایران کی جانب سے اضافی تیل آنے کے بعد تیل کی قیمتوں میں مزید کمی آئے گی۔ اقتصادی پابندیاں اٹھائے جانے کے بعد ایران کا کہنا ہے کہ وہ تیل کی برآمد میں یومیہ پانچ لاکھ بیرل اضافے کا ارادہ رکھتا ہے۔ ایران کی تیل کی برآمدات پہلے ہی جنوری میں نو ماہ کی بلند ترین سطح پر پہنچ گئی ہیں۔ تیل کی عالمی قیمتیں گزشتہ 18 ماہ میں 70 فیصد تک کم ہو چکی ہیں۔ اس کی وجہ چین کی معاشی ترقی کی شرح میں کمی کے نتیجے میں تیل کی طلب میں کمی کے ساتھ ساتھ امریکہ میں شیل تیل کی پیداوار بڑھنے سے عالمی مارکیٹ میں تیل کی رسد میں اضافہ جبکہ طلب میں کمی کو قرار دیا جا رہا ہے۔ ماہرین کے خیال میں اس وقت طلب کے مقابلے میں تیل کی یومیہ پیدوار دس لاکھ بیرل زیادہ ہے۔ تیل کی قیمتوں میں کمی کا اثر ان عرب ممالک کے بازارِ حصص پر بھی دیکھنے کو ملا ہے جو تیل کے بڑے برآمد کنندہ ہیں۔ گزشتہ ہفتے سعودی بازارِ حصص میں شیئرز کی قیمتوں میں چھ فیصد سے زیادہ کمی آئی جبکہ قطر اور دبئی کی سٹاک مارکیٹس میں بھی مندی کا رحجان رہا۔ قطر کی سٹاک ایکسچینج میں حصص کی مالیت میں 7 فیصد جبکہ دبئی میں 4 فیصد کمی ہوئی ہے۔


متعلقہ خبریں